My.raiffeisen.al – banka drejt klientit

Shumë shpejt banka do të nxjerrë produkte të reja digjitale, duke synuar që, brenda vitit 2021, klientëve tanë t’u ofrohen online edhe produktet më të rëndësishme e komplekse bankare, duke e bërë kështu realitet ëndrrën që Banka Raiffeisen të jetë në dorën e tyre përmes celularit, 24/7. 

Intervistë me Resmi HIBRAJ

Drejtor i Kredisë PI & Bankingut Digjital

RAIFFEISEN BANK ALBANIA

1. Çfarë është platforma my.raiffeisen.al?

Platforma my.raiffeisen.al është një nga risitë e fundit digjitale, që Banka Raiffeisen sjell në mënyrë të vazhdueshme për klientët e saj. Objektivi i Raiffeisen është që, përmes teknologjisë së fundit e në mënyrë sa më të thjeshtë e intuitive, të çojë bankën aty ku është klienti dhe jo të detyrojë klientin të vijë aty ku është banka. Kjo është e ardhmja e bankingut, një realitet i pashmangshëm edhe për tregun tonë, që në mënyrë tradicionale ka pasur pirjen ta bazojë ofrimin e shërbimeve bankare përmes ndërveprimit personal bankier-klient. Risitë digjitale kanë për qëllim që ta ruajnë vlerën e shtuar të vëmendjes personale që banka do t’i kushtojë klientit dhe ta përmirësojnë atë, duke e kanalizuar atë drejt produkteve me komplekse, si: kreditimi apo investimet.

Platforma my.raiffeisen.al erdhi si një zhvillim i natyrshëm i progresit që ka bërë Raiffeisen gjatë 5 viteve të fundit, në përputhje me strategjinë e saj për ta transformuar eksperiencën bankare të klientëve. Strategjia jonë përqendrohet në zhvillimin e kulturës se inovacionit, digjitalizimin e produkteve/shërbimeve, me fokus bankingun në celular, dhe partneritetin me fintech-sat shqiptarë.

Fillimisht ne sollëm aplikacionin mobile dhe web, Raiffeisen On, i pari në treg që krijoi mundësinë për të bërë të gjitha pagesat, transfertat, rimbushjet telefonike, investimet dhe aplikime për produkte të ndryshme tërësisht online, 24/7. Me tej erdhën risitë e tjera, si: pagesat digjitale person-person, përmes KUIK, si dhe person-biznes, përmes Scan&Pay, duke revolucionarizuar kryerjen e pagesave, për t’u ndjekur më vonë nga ndihmësja e parë digjitale në treg, RONA, ku përmes teknologjisë së inteligjencës artificiale klientët marrin përgjigje për pyetjet e tyre, pa pasur nevojë të telefonojnë shërbimin e klientit, ose të shkojnë në degë.

Hapi tjetër cilësor, e sigurisht më ambicioz nga pikëpamja e kompleksitetit dhe përmbushjes së detyrimeve rregullatore/ligjore që ofron legjislacioni shqiptar, është ofrimi te klientët e rinj i mundësisë për t’u bërë pjesë e Raiffeisen përmes një procesi tërësisht online, pa qenë nevoja të vizitojnë degën. Domethënia e një risie të tille për tregun tonë është e jashtëzakonshme dhe do përmirësojë ndjeshëm cilësinë e shërbimit për klientin.

Pandemia COVID-19, përmes kufizimeve dhe distancimit social të paprecedent për shoqërinë tonë, evidentoi nevojën për zgjerimin e shërbimeve digjitale në çdo sferë të ekonomisë, përfshi këtu dhe sektorin bankar. Pamjet e shpeshta të radhëve të gjata përpara bankave dhe institucioneve të tjera ishin një dëshmi e qartë që vendi ynë, dhe bankat si pjesë e tij, janë ende prapa prirjeve globale. Banka Raiffeisen, e vetëdijshme për situatën dhe pasojat, intensifikoi punën e nisur përpara vitit 2020, për të mundësuar pranimin e klientëve të rinj tërësisht online dhe platforma my.raiffeisen.al është oferta jonë digjitale për klientët e rinj.

2. Si u lehtësohet klientëve eksperienca bankare?

Platforma my.raiffeisen.al sjell disa përfitime të rëndësishme për bankën dhe klientët. Për bankën është një mundësi për t’i ofruar klientit shërbim të shpejtë, komod, në kohë reale dhe tërësisht falas. Kështu, ajo diversifikon më tej kanalet përmes të cilave ofrohen produktet dhe shërbimet bankare. Edhe me domethënëse janë përfitimet për klientët. Tashmë është fakt që, në më pak se 15 minuta, qytetari bëhet klient i ri i Raiffeisen Bank, duke hapur një llogari të re, duke marrë një paketë me përfitime të shtuara, aplikon për një kartë debiti pa kontakt, etj.  E gjitha kjo mundësohet përmes plotësimit të pyetësorit me të dhënat personale dhe identifikimit me video, si dhe firmës digjitale.

Rëndësia e këtyre përparësive është e jashtëzakonshme, kur mendohet se sa kohë e çmuar do të duhej të harxhohej në degë, duke pritur në radhë, pa përmendur këtu rrezikun e COVID-19, si pasojë e ekspozimit ndaj kontaktit të shtuar.  

3. Na njihni me tepër me procesin e firmës digjitale/elektronike

Firma digjitale/elektronike mundësohet përmes një procesi të sofistikuar dhe të sigurt, duke garantuar identifikimin e klientit, ruajtjen e konfidencialitetit të të dhënave dhe ruajtjen e provës që klienti ka firmosur në formë digjitale në arkivën tonë virtuale. Firma digjitale është një risi edhe për tregjet e zhvilluara, e në këtë këndvështrim, jetësimi nga Raiffeisen si banka e parë në treg, ka vendosur një precedent të rëndësishëm, që do ta zhvillojë më tej sektorin bankar. Procesi është i thjeshtë dhe klientit, pasi ka kryer gjithë procesin e regjistrimit dhe aplikimit, i dërgohet dokumenti që duhet firmosur në forme digjitale nga ana e bankës. Klienti hap aplikacionin e firmës digjitale, hap dokumentin PDF për ta lexuar/verifikuar dhe vetëm me një klikim e firmos dokumentin, i cili me tej i përcillet bankës automatikisht.

4. Tashmë që klientët mund të hapin një llogari online, kur do të kenë ata mundësi që të përfitojnë edhe produkte të tjera, duke aplikuar online?

Hapja e llogarisë nuk është një proces i izoluar, por shoqërohet me mundësinë për të aplikuar, apo shprehur interes edhe për produkte të tjera të bankës. Që në momentin e parë të aplikimit klientët kanë mundësinë të zgjedhin opsionin që dëshirojnë, nëse duan vetëm një llogari të thjeshtë, apo një paketë që ofron një numër shërbimesh të rëndësishme pa kosto (vetëm kostoja mujore e paketës). Bashkë me llogarinë, klienti ka mundësinë të aplikojë për kartën e debitit, duke mundësuar depozita dhe tërheqje nga llogaria.

Pas hapjes së llogarisë, klientit i mundësohet shkarkimi i aplikacionit mobile Raiffeisen On, ku mund të kryhet çdo transaksion bankar që kryhet në degë. Njëherësh, klienti ka mundësi të fillojë të përdorë risinë digjitale KUIK, që mundëson dërgimin e parave drejt kontakteve personale përmes celularit, brenda pak minutave. Ky shërbim është ndër më të kërkuarit në tregjet e zhvilluara dhe është përqafuar me entuziazëm nga mbi 35,000 klientë të Raiffeisen.

Raiffeisen On ofron dhe shumë shërbime të tjera të pagesave dhe mirëmbajtjes së llogarisë, si dhe mundësinë për të bërë blerje përmes Scan&Pay. Njëkohësisht, klienti ka mundësinë gjithashtu të shprehë interesin edhe për produkte të tjera që banka ofron.

5. Duke pasur parasysh nevojën e tregut, cilat do të jenë risitë digjitale që Raiffeisen do të ofrojë në të ardhmen për klientët e saj?

Duke iu rikthyer diskutimit me lart për revolucionin digjital që po përjeton vendi ynë, është evidente që për secilin prej nesh teknologjia po e ndryshon mënyrën sesi ne e organizojmë kohën dhe veprimtaritë tona, në një forme që nuk imagjinohej pak vite më parë, e këtu bankat nuk bëjnë përjashtim. Gjatë 2020-ës Raiffeisen e ndryshoi në mënyre të shpejtë dhe efikase organizimin e punës, duke punuar në mënyrë virtuale, për të mbrojtur shëndetin e punonjësve, si dhe për të garantuar ofrimin e shërbimit për klientët në mënyrë të pandërprerë, pavarësisht sfidave serioze që solli COVID-19. Ishte pikërisht progresi ynë digjital i viteve të fundit, që mundësoi bankën të dilte më  fortë nga kriza dhe me një bazë më të madhe klientësh. Ne jemi të vendosur për ta zgjeruar më tej gamën e shërbimeve digjitale që ofrojmë; nevojat e tregut për shërbime të reja digjitale të shpejta e të sigurta do të vijnë vetëm në rritje dhe Raiffeisen do të vijojë të mbetet gjithmonë një hap përpara tregut, për t’i paraprirë kërkesave të klientëve.

Shumë shpejt banka do të nxjerrë produkte të reja digjitale, duke synuar që, brenda vitit 2021, klientëve tanë t’u ofrohen online edhe produktet më të rëndësishme e komplekse bankare, duke e bërë kështu realitet ëndrrën që Banka Raiffeisen të jetë në dorën e tyre përmes celularit, 24/7.  Klientët presin që marrëdhënia me bankën të vijojë më tej, gjithmonë dinamike dhe në përputhje me nevojat e tyre, që evoluojnë çdo ditë. Raiffeisen synon t’i përmbushë këto kërkesa përmes një eksperience digjitale të lehtë dhe transparente, duke i ofruar klientit diçka më shumë: një përfitim, shpërblim për besnikërinë, një ofertë, pikërisht kur dhe ku i duhet klientit. 

Ky është misioni dhe premtimi ynë digjital!